妹妹的第14個月

踏入第14個月, 妹妹終於都學會了用飲管杯飲水!  但仍然是bb 話, 會說是單字是: 家、dad、包、姐.  真押韻!

妹妹一天比一天好玩.  她明白的事情亦很多, 只是不懂說出來.  例如:
-當她正在看bb 碟的時候, 婆婆將電視轉至新聞台.  她就走到dvd 機前不停禁, 她最初以為是dvd 壞了.  後來禁了幾次後電視都沒有反應, 就轉過頭向婆婆投訴, 直至婆婆嫌她煩, 把電視轉回看dvd 畫面才罷休.
-聽到有大人說「去街啦」.  她就會坐在換鞋區等穿鞋襪.  如果她看到地上有襪的話會拾來給大人.  回家後會把襪子自行脫掉.
-聽到「洗白白」就會走進廁所.
-爸爸放工回家, 細小姐一定是以掟玩具來迎接爸爸入屋.  大人越笑她就掟得越起勁.  而大小姐放學回家, 她就必定會去攬實她.  只是分開數小時, 但尤如分開數年後去接機的場面.
-由於不肯坐highchair, 每次吃飯前婆婆都會拍拍椅子叫她坐下.  幾次以後, 當聽到「食飯啦」就會自己去拍拍椅子.  不用婆婆操勞.
-爸媽和家姐去完學校旅行後把風箏帶回家, 放在婆婆房中.  她一入進到房中就知道有「新玩具」.  看來媽媽不用費心神訓練她的觀察力.
-近幾星期媽媽開始接管細小姐的陪瞓工作.  以往有一段時間都是由牛太親自處理.  後來因為被大小姐投訴, 所以又外判給工人姐姐.  但牛太發現姐姐的陪瞓方法令細小姐養成陋習.  還是自己來做比較好.  由媽媽陪睡的第一晚, 細小姐喊足一小時, 不停想搵工人姐姐.  第二晚, 是喊15分鐘.  第三晚就沒有哭了.  昨天晚上, 牛太因為要趕製曲奇, 就找姐姐當一晚替工.  可是小姐知道客廳有人, 即使是姐姐陪睡都不要.  當牛太做好曲奇後就關燈, 她看到爸爸走進房間, 想去追.  進到走廊看不見人, 就走回客廳要媽媽抱睡覺.

在12月初氣管炎後, 媽媽替細小姐換了一位中醫伯伯.  細菌小子暫時離開了牛家.  但牛太不敢放肆.  在又濕又凍的天氣下.  還是細心照料小姐們的氣管為上策.

開心妹妹

假若妹妹不是半夜這麼難纏的話, 她是一個很好湊的bb.  昨晚從玩具箱中找到3隻小鴨, 就好像遇見老朋友一樣, 跟小鴨玩了一個小時, 對著牠們說話、大叫、大笑.  不亦樂乎!

5歲生日

今年大小姐生日沒有開生日會, 最主要原因是媽媽不想她收到大量生日禮物(免得她每日生日都只期望收禮物而忘了生日的意義).  其次就是地點問題.  牛棚不算大, 極其量只能容納三兩個家庭, 而牛太家人已經可以塞爆屋, 加上去年生日會後的混亂場面, 固不想再從蹈覆徹.  其他開party的 地方, 如clubhouse function room 或冒險樂園都不是牛太那杯茶.  所以牛太游說小姐, 生日前到海洋公園玩一日當慶祝生日.  她說想有小朋友一起玩, 除了表哥外, 就邀約了主日學同學仔昊朗哥哥一家一起去玩.

出發前得知當天天氣不太好, 於是就叫所有小朋友們祈禱, 求天父賜下美好的天氣.  大小姐真的要感恩, 因為出發前一天和後一天都是下雨天, 而當天就是陰天, 天氣乾爽且很舒服. 

到達海洋公園大約是早上十一時半.  在老大街玩了一次木馬, 就乘搭吊車到另一邊觀看企鵝和其他北極的動物.  企鵝仔很可愛, 走起路來和妹妹一樣.  之後本想玩一個他們適合玩的過山車.  可是人龍太長, 小朋友們主動放棄.  吃過午餐後, 就乘坐吊車返回兒童王國.  牛太想叫他們去看看熊貓和魚類.  可是他們只想玩.  就是這樣, 幾位小朋友留在王國裡玩了兩個小時.  跳樓機玩了至少8次.  由最初表哥不敢玩, 到越玩越瘋狂. 接著是跳彈床, 都數不清跳了多少次, 還有飛碟和坐火車.  在其他看來很無聊, 幾百元入場什麼都不去看, 就是留在遊樂場玩.  不過, 來樂園都是想他們開心, 無謂免強他們去做一些不想的事情.  下午五時半, 天都快黑, 是時候離開.  就是這樣, 幾個小朋友和大人就渡過了愉快的一個週未.

牛太事前跟昊朗媽媽相量好, 不要送禮物給大小姐, 因為牛太覺得遲早也會被嫌棄, 生長在現今社會的小朋友根本無懂得珍惜.  相反, 藉此機會可以給她洗腦: 生日不是要收很多實質的生日禮物, 有小朋友陪玩一天也是一份生日禮物, 是金錢買不到的快樂.  希望大小姐明白媽媽沒有為她開生日會和特意安排沒有生日禮物的意義. 

細小姐的第13個月

細小姐在12個月半時正式加入自由行一族.  只有18磅的她仍然是穿著中碼片, 8隻牙仔已經完全長出.  流口水及瘋狂咬人的情況有明顯改善. 

這個月間細小姐的學習能力進步神速.  懂得玩各樣玩具一直是強項, 攀爬更加是無師自通.  本來牛太無打算放置圍欄. 但眼見她快由床仔爬出來之後都逼不得以.  誰知, 正所謂「你有張良計, 我有過牆梯」！先是把本來進入不了走廊的四方圍欄推成錂形後進去.  繼而發揮一字碼神功三爬兩撥就從圍欄趒走出來.  真是沒有親眼看到都難以相信.  在 「特異功能」以外, 細小姐各方面的發展都很好, 已能聽得明白很多旨令如「比比」「去搵邊個」「no」等等.  動作方面亦能做到很多很多.  很愛聽媽媽唱兒歌做動作.  唯獨是說話能力未乎理想.  暫時只會在吃食物時說「um」, 極想找姐姐時說出近似姐姐的發音.  其餘都是bb 話.  妹妹, 很期待你叫爸爸媽媽及家姐.  努力呀!
在風光背後, 總有不為人知的另一面.  從9月中開始, 細小姐不停病.  發燒的次數多到數不出.  還有咳、傷風、驚嚇, 最新的杰作是腸胃炎加氣管炎.  在這種種情況的結果就是夜睡不寧, 接著就是虐待爸媽半夜要招呼她.  查實牛太已經很勤力帶她看中醫清理感冒.  可是妹妹的身體實在太潺弱, 任何風吹草動都能使她生病.  妹妹呀妹妹呀, 希望你不要再常常病, 媽媽不想見醫生多過見朋友, 可以嗎?

成果

這是大小姐練習成果.

其實有段古仔:

話說大小姐去年要求爸爸買個呼拉圈給她, 因為在學校見到同學仔轉, 覺得好好玩.  買回家後, 當然轉不了啦!  於是爸爸就從youtube 找了些video 給她看, 從此她就知道轉呼拉圈是將身體擺動前後前後, 而不是左右.  幾經練習後, 轉一、二百下實在難不到她.  有次她在學校玩呼拉圈時, 老師問她可不可以一面行一面轉.  她說她不懂.  如是者當老師多問她幾次後, 以她好勝既性格, 就不再在學校玩了.  牛太知道後, 就鼓勵她凡事就算有天份, 都要加以練習才能成功.  而爸爸又再在youtube 找來相關係影片.  結果練成了這個秘技.  媽媽覺得她真的很叻很利害呢!

一歲啦

轉眼間, 細小姐已經一歲.

一歲的她, 重18磅, 有6隻牙仔, 有2隻正整裝待發, 所以現在牙痕到不得了, 像小吉上身一樣, 拿起任何硬物都要咬.  能自如地立站, 能穩陣地行十步, 如果困在圍欄內, 更加是通屋行.  細小姐會用不同方式去歡迎家中各成員回家.  例如見爸媽放工回家, 就會以極速爬到他們身邊要抱.  見到家姐放學呢, 就會不停「丫丫丫丫」跟她打招呼.  帶她外出的話, 整層39樓的住戶都會知道細小姐出巡, 因為她會開心到大叫, 直至落到平台才收聲.  她又會知道爸媽換上去街衫後就是有街街去, 此時她亦會蹼向爸媽, 誰也不能再從爸媽手上可以把她奪去.  不過她的要求很低, 倘若爸媽是去上班的話, 只要帶她出去禁lift 已經滿足. 

細小姐比起大小姐還要百厭.  最新自創的動作是爬上小童椅子, 面向椅背跪著, 然後就拉著椅背搖, 自制搖搖馬玩.  最喜歡借力爬上梳化再走到窗台搞事.  所以, 經常也要困她在圍欄內.  不過, 別以為她是被困, 相反, 她更能自由走動.  工人姐姐走到房間, 她就推著圍欄追入去.  本來一個四方形的圍欄是進不到走廊的, 她就先把圍欄推成一個錂形, 這樣就可以「為所慾為」了.  那麼為什麼要放她在圍欄內呢?  因為怕她周圍擒很危險, 而她又未到跌過就知痛的地步.  除了在「爬」「擒」很出色外, 玩玩具都有一手.  她能夠把lego 逐粒搣開, 然後放入桶桶; 媽媽疊高了十個不同size 的小桶, 她會一個一個的拿下來, 接著是等人讚她叻叻 看到媽媽把小桶當作小鼓打, 她又會模仿.  見到「翻翻書」呢, 她又會翻過夠本. 

其實細小姐在各方面發展都很好, 只是在說話要大落後, 到目前為止仍未有準確的言語.  所發出的聲音亦只有約十個.  不過近幾天多了bb 話, 希望她一直進步.  還有, 在過去的365日, 媽媽起碼有360個晚上不能好好睡覺.  最近找到一位比較年青的中醫師, 希望她能為細小姐對正下藥, 讓她可以好好睡覺, 爸媽可以長命一點!

給女兒最「好」的

最近細小姐在學行, 她每踏出一步, 全家都會發出歡呼聲.
雖然是第二次經歷, 仍然很興奮.

細小姐在日本旅行後沒有像過往黏著工人姐姐.  很明顯, 她知道跟著父母有「著數」.  很多朋友都佩服牛生牛太經常帶著細小姐四處去.  辛苦嗎?  當然辛苦, 雖則她只有十多磅, 但孭著行一點也不輕鬆.  加上要全天候盯著她, 少一點體力都不可.  然而, 我們卻很愛帶她同行, 因她是牛家的一份子, 有喜樂的事很應該同分享.  有些家長會因為少時間陪仔女而給他們在物質上得到滿足.  牛太很相信, 小朋友一定喜歡父母陪伴多於玩具, 那管是玩一些低能無聊的遊戲.  親子關係是要用時間儲回來的, 亦希望她長大後知道爸媽沒嫌她麻煩要留下她.

最近鄰家的男主人突然離世, 據聞是癌症. 遺留下來的, 是太太和一個年紀比細小姐細一個月的兒子. 聞者心酸. 單親家庭的路難行, 願天父看顧.

能夠見証女兒的成長, 實在很幸福. 有父母陪伴成長的小孩更幸福.

選好了

時間過得很快, 大小姐明年9月就是小學了. 

一直以來, 牛太心中都認定母校是大後備, 考不到理想的直資學校, 大不了便入讀母校.  畢竟, 都是一間band 1 的小學.

不過, 原來「剎到埋身」的時候, 決定卻不一樣.

大小姐有位同學的姐姐正就讀母校, 根據她媽媽說, 每天6時40分要上校車, 8 時上課, 下午3時半下課, 要差不多5時才回到家.  功課極其多, 每晚要10-11 時才能完成, 功課堂能夠做完一半功課要「還神」. 還有一星期要交5張圖畫, 每星期都會有中默英默.... 牛太一想到女兒每天要6時起床已經「退肽」, 曾經想過自行帶她回校, 但也沒多大幫助, 最多都只可能遲半小時起床.  搬屋嗎?  更加沒可能!  再加上沒完沒了的功課, 以及最令牛太卻步的天主教學校. 而好處就只有一個, 就是中學校網肯定比將軍澳好.  就是這個原因要去選擇母校?  爭扎了一段時, 還是放棄, 因為早起的大前題已大於一切.   於是決心努力做功課, 搜集一下將軍澳區津小的資料及情況.

詢問過好幾位姊妹的意見, 以及網上的討論, 牛太最後選了循道衞理.  原因:
1.  該辦學團體的學校在好幾區的口碑都好很;
2.  校舍新及大;
3.  其生命教育課程. 

在將循以外, 牛太更想大小姐入讀播道書院.  雖然有很多聲音告之EC 的課程太淺, DSE的成績不好等.  但牛太最喜歡這校的,  是學校的全人教育, 在現今世代, 牛太實在不怕女兒學少幾個英文字, 背少幾首詩, 學做人是最難的功課.  如何面對逆境、倚靠神、順服、做有禮貌有信心的孩子等等都是學校著重的.  故此, 牛太決定, 倘若今年踏進不到EC 的大門, 就讓她在津小先讀一年小一, 明年再以小一生之齡重考EC, 屆時機會應該會大一點. 原因是大小姐是細女, 讓她做大女能夠打好根基, 更有信心面對將來之學業.

路就是這樣安排, 最後是什麼樣, 還是交托給神, 祂一定會安排一間合適的學校給大小姐!

大小姐之笑話(三十)

很久沒有記下大小姐有趣的對話, 因為媽媽實在太懶.  不過最近有幾個很好笑, 不得不記下.

cc:「媽咪, 我郷下響邊度呀?」
牛太:「我真係唔知喎, 你係跟daddy, daddy 郷下係邊你就係邊. 我就係潮州. 因為我係跟公公」
cc:「咁daddy 郷下係咪即係沙田呀?」
哈, 看來她是明白郷下的意義.

有日中午電話中的對話
牛太:「點解妹妹響到喊呀?」
cc:「因為困住響床仔law」
牛太:「哦, 放左響床仔.」
cc:「唔係放, 係困, 困先會喊架.」
牛太:「okok, 咁你去同佢玩下啦.」
cc:「我有d 野同你講呀, 其實我想去poo poo」
牛太:「咁快d 呀, 小心唔好痾埋個腦袋出黎呀!」
cc:「你都傻傻地, 我個腦生響個頭到架麻, 唔係生響pat pat, 點會痾左出黎呢!」

又是一個有關腦袋的笑話
cc:「媽咪, 可唔可以幫我搵d 消防設備的圖片呀, 即係防火鐘同滅火器」
五分鐘後, 又收到電話
cc:「媽咪, 你都係唔駛搵防火鐘同滅火器啦, 因為我識畫, 你搵其他比我啦」
牛太:「咁即係要邊d 呀」
cc:「你自己響個電腦到搵啦!」
數分鐘後
cc:「媽咪, 你搵到未呀?」
牛太:「我搵左滅火筒同滅火沙」
cc:「係呀,呢d 岩呀, 老師都有講過呢d」
牛太:「其實你係唔記得左老師講過呢d野, 係咪?」
cc:「哈哈哈哈哈, 我想你用下個腦之麻」
牛太:「點呀, 今日個腦天跌左去邊」
cc:「響張椅到, 放學時見到, 執返落書包啦!」
好好笑, 她懂得跟媽媽開玩笑.


以下是有關爸爸的
正在「看」著妹妹的爸爸, 眼睛盯著電視.
cc:「daddy, 你唔好又發夢啦! 妹妹又咬玩啦」

小姐有事要求爸爸協助
cc:「daddy, 你過黎啦」
牛生:「你過黎唔得架咩」
cc:「咁點解你唔過黎丫」
最後當然是爸爸就犯!

細小姐的第十一個月

踏入11個月大既細小姐非常可愛好玩, 請請、拍手、拜拜等動作已經難不到她.  在老遠說peek a poo, 她一定會很開心地走來找你.  她是攀爬高手, 想爬上梳化, 會利用放在梳化前的小椅子借力, 工人姐姐房的長梯是她展示身手既好地方.  不過, 除了能準確地對著麵包說包包外, 就只會發出「丫丫」聲, 看來爸媽要努力教她說話.

除了半夜經常喊外, 妹妹大部份時間都非常合作, 現在無輪午睡或晚上睡前都沒有喊了, 時間到了還會走到姐姐身旁要她抱.  帶她去街沒有多大難度, 會乖乖坐車車, 會自己玩, 不會因為地方陌生而喊.  就正正是她的合作, 所以爸媽會帶她一同外出.

還有30日就一歲了.  爸媽期待你的自由行.  加油!

天生購物狂

牛家大小姐自小喜歡購物.  在很年幼時, 她每經過有貼紙賣的地方就賴死不走. 然後轉戰到超巿, 指東指西要媽媽買各款水果, 但回家後又不肯吃.  當媽媽教訓她後就略為收儉.  試過媽媽在考慮買不買某件物品時, 她總會舉腳贊成, 即使那件物件與她無干. 總知, 她拿著新買的東西就滿足.  牛太的消費原則是: 一. 家裡有的暫時不買, 留待用完後再買.  二. 無須要的東西不買.
經過這幾年的教導, 大小姐到超巿時已不會再亂發要求, 還懂得協助提醒媽媽要入什麼貨.

牛家大小姐是一位很會為自己爭取福利的小朋友, 亦是一位想人有我有的物質主義怪.  如果牛太亦是購物狂的話, 大小姐必定很開心並且很容易得到物質上的滿足.  可是, 她的媽媽卻不是這樣.  話說, 大小姐的波鞋最近不合穿.  而她眼見幾位同學都有閃燈鞋, 當她知道可以買新鞋時, 就要求要買閃燈鞋.  牛太沒有立刻答應她, 只向她說出幾個原則: 要價錢合理、要適合在公園跑跳.
星期六早上學琴後, 就帶她在該商場逛街.  在千色店內, 大小姐很興奮, 因她找到了閃燈波鞋.  不過當爸媽仔細看過後, 發現那幾款都不適合穿著到公園去, 就告訴她要到其他鞋店找找.  在想離開時, 大小姐開始發爛, 因她想要的得不到, 並游說媽媽想要閃燈涼鞋和高踭鞋, 因為同學們都有.  牛太嘗試跟她解釋, 涼鞋已經有, 等下次才買.  而高踭鞋就一定不會買, 因為穿上後會跌, 不適合小朋友諸如此類.  接著, 她就說高踭鞋很靚、同學仔都沒有跌、為什麼同學仔的媽咪會買.... 牛太知道, 繼續跟她解釋是沒用的, 只好命令「再唔收聲今日乜野鞋都唔買」.  雖然被逼離開千色店,  但很快就找到新目標.  原來, 大小姐已經長大到要買中童鞋.  可是, 中童款的最細碼是長斷的, 而且只很少款式有魔術貼.  最後在最後一間運動店買到大小姐和媽媽都合心意的波鞋. 

買到波鞋, 心情也靚靚.  這時媽媽可以講道理了. 
媽媽問: 「點解唔買閃燈涼鞋?」
cc:「因為我已經有.. 可唔可以下次要買涼鞋時就買閃燈涼鞋?」
媽媽: 「可以, 但唔可以有踭. 因為高踭鞋唔岩小朋友著, 你唔好問我點解邊個邊個有, 我唔知人地媽咪點解買, 但我一定唔會買一對鞋比你, 而你著完會令對腳唔健康.  我有責任令你安全同健康!  仲有, 你唔可以見到d 同學有乜鞋你都想要.  買咁多野返屋企, 一來無地方放, 二來你都著唔晒, 咁樣就係浪費」
cc:「咁我星期一著一對, 星期二著第二對, 星期三著第三對咪得law」
媽媽:「咁樣就係浪費, 因為無須要.  你已經有涼鞋、波鞋、拖鞋, 落雨有水鞋、冬天又有boot.  你有既, 好多小朋友都無, 要知足先得.  明唔明? 」
cc: 「明白啦」

媽媽:「你知唔知道, 其實我可以唔帶你一齊去買鞋, 我可以買左就拎返屋企比你, 唔比你揀.  點解我帶埋你去?  因為我尊重你, 想比你選擇.  所以, 你都要尊重媽咪的決定, 因為我唔係無理由唔比你買.」

牛太知道有很多媽媽都盡量不會帶小朋友同去shopping, 尤其是超巿, 怕他們扭計要買零食.  但牛太覺得這是斬腳趾避沙蟲.  用錢的原則應由小灌輸, 特別是大小姐這類天生愛洗錢的人, 不然的話, 有朝一日有錢在手, 就會把所有花光在慾望上.  相信, 在她們的世代裡, 節儉是很難學的功課.  但牛太希望透過身教, 使她們秉乘婆婆和媽媽的美德.

細小姐的第10個月

十個月大的細小姐, 長了四隻門牙, 可以自己企一會兒, 距離自由行的日子不遠了.  吃奶量越來越少, 現在是1,2oz 就夠.  不過就很喜歡吃固體食物, 麵包、粥、水果、餅一律不會放過.

十個月大的細小姐好好玩, 雖然未會說話, 但已學會了很多事情.  例如知道工人姐姐房間的位置; 想要家姐手上的玩具, 就誓要搶到為止; 時常會跟家姐鬥叫, 一人一句, 你來我往; 想要daddy抱, 會將雙手攬實雙腳夾實爸爸, 目的是不讓其他人抱走; 會固意將玩具掉入梳化底, 然後去裝去找, 找到了, 又再重複.  拿著會發聲的樂器玩具搖, 如果有人讚她叻叻的話, 她會搖得更加起勁.   媽媽覺得, 細小姐比家姐有福.  因著家姐的關係, 細小姐所踏足的地方比同齡的家姐多. 不要說外遊, 至少爸媽絕對不會帶同齡的大小姐去沙灘.  帶她同行雖然辛苦, 不過這是我們願意的. 

沖繩遊記

http://5daysinokinawa.blogspot.hk/

細小姐的第9個月

過去的三十天, 細小姐的最大進步就是願意跟爸媽玩, 不會時刻都黏著工人姐姐.  又因著常以涼茶伴奶, 很多時都能一覺睡至天光.  不過, 爸媽有點貪心, 希望她能多睡一小時就更好, 因為, 現在的起床時間實在不太人道.  還有, 終於四腳爬爬了, 不再是倚賴前臂用力向前爬.  看來, 她會很快變自由行.

因家姐的關係, 細小姐比cc同齡時多去了很多地方.  至少, 爸媽不會帶8個月大的大小姐去沙灘, 更莫說外遊了.   當很多人知道細小姐將會一同去旅行時都表示驚訝,  想像得到帶她去旅行比在家湊仔辛苦萬倍.  不過, 如果見過細小姐是如何歡迎親人回家, 相信就會明白爸媽為什麼不會丟下她.  就算辛苦一點都是正確的決定.  盼望, 她長大後亦不會丟下父母吧!

學以至用

最近大小姐有種壞習慣, 就是經常把摯愛的攬枕拿出客廳 -- 啜.  就像bb 啜奶咀一樣.  牛太對這行為百思不得其解, 亦調查不到原因, 因為當時人不太合作, 只說「鐘意啜」.  為了幫她戒掉這個行為, 牛太向她說明壞處後就立下規矩, 只讓她在睡覺時攬著攬枕, 而攬枕只可以在床上出現.  若果出現在梳化, 牛太定必把它掉去, 然後就連睡覺都沒有「腸腸」了.

大小姐聽過後就同意媽媽的規定, 不過說「但係我會唔記得架喎.」媽媽就要她自行想辦法去令自己記得, 於是她就說要畫下來.  牛太當時滿腦問號「畫? 點畫?」她就二話不說去實行.  不久就出現了這樣畫.  因為學校的常識科經常都是出現幾張圖畫, 然後要他們剔出正確的行為.  就是這樣, 她就用了這個方法去提醒自己什麼是可以做的.

除了笑到肚痛, 媽媽實在很佩服她能將所學的運用到生活層面.

生病記

12年下半年一開始, 兩姊妹開了一個病毒分享會.

7月2日的早上, 原本打算帶大小姐到公眾玩水.  在吃早餐時, cc 鮮有地說喉嚨痛.  牛太起初以為她是因為不想吃早餐想早點去玩而找出的藉口.  不過, 見她再三說喉嚨痛, 心知不妙.  回家探熱, 38.3度.  原本的計劃要取消了, 玩水日改為休息日.  吃過藥睡過覺後仍然高燒, 直到晚上7時, 大小姐燒到39度, 幾經考慮, 還是趁早帶她去看急症, 免得半夜要出動就更麻煩.  7時多到達法國醫院, 雖然, 急症門診沒有兒科醫生, 但, 既然來到, 就看看吧.  等了一小時, 終於輪到大小姐.  牛太向醫生述說了女兒的病情, 醫生漫不經心地叫牛太不用緊張, 每個人都有抵抗力對付病毒.  牛太向他說出憂心的原因, 並希望可以找出病因以對正下藥.  可是, 這位醫生完全沒有醫者父母心的心腸, 只重申發燒會自然康復, 不須多靠藥物.  很明顯, 這次醫院之旅白行一趟了.  既浪費金錢又浪費時間, 得到的是一支普通不過的退燒藥.  回家後, 大小姐累得立即爬上床.  上床前, 體溫是39.5度, 為免半夜太高燒至脫水和抽筋, 還是塞了粒藥才安心一點.  很快, 約10時許, 體溫已回落.  不過, 作為媽媽的, 很難安睡,  久不久就摸摸頭看她的情況.  零晨一時, 睡在隔離的女兒又變回一個火爐, 幸好契媽還未睡, 徵詢過她的意見, 替她再塞一粒藥.  然後給她喝水.  可能實在太辛苦, 她一直在展轉反側不能入睡.  直到三時許, 終於退燒並睡著了.  而牛太, 應該是四時左右找周公去.
7月3日, 塞了第二粒藥後就沒有再發燒, 牛太帶大小姐到她的兒科醫生看病.  不愧為兒科醫生, 他一聽到病徵後已經說她很可能是中了腸病毒.  再看看喉嚨後就確診.  他還教牛太看她的吊鐘周圍生了幾粒類似飛滋的小瘡.  所以她說喉嚨痛.  腸病毒沒有特別藥更治, 一般靠自己抵抗力就可以了.  醫生叮囑千萬不要傳染給妹妹, 否則就很麻煩.  知道發燒原因, 牛太放心了很多.
大小姐的「喉嚨痛」跟大人的不同, 她的「喉嚨痛」是一旦有食物觸碰到就會痛, 吃喝凍的食物感覺會好一點.  婆婆本來煲好白粥給她吃, 可能是太痛, 沒有食慾的大小姐完全不想吃, 幸好婆婆想起她至愛的豬肉鬆, 結果很免強地全日就是吃了兩碗白粥.
7月4日, 雖然退了燒, 不過仍然很攰. 雖然是評估週, 不過這個狀態回去考試亦不是好事, 還是在家休息比較好.  牛太聯絡學校, 希望星期四能上學, 不過校長和老師都拒絕, 最後只讓她在下午時段回校補考.  可能已退燒, 加上牛太上班, 大小姐對「帶菌」的防禦少了, 整天不停跟妹妹玩.  連帶病毒都一併跟妹妹分享.
7月5日, 牛太又要請假.  起初打算是用年假, 但早上起來發現喉痛得不得了, 就「順便」請病假吧. 嘻嘻.  早上, 為了讓cc 可以回校補考, 就要到普通科門診求醫, 希望得到一張証明小姐已康復的醫生信.  再一次証明, 小孩子生病, 還是去看兒科比較好.  牛太向醫生陳述了來看病的因由, 然後醫生檢查了小姐的喉嚨, 說:「雖然有少許白點, 但已經退燒, 不是手足口病, 可以上學了.」就是這樣就得到了一封証明信!!!  看過西醫後, 便帶小姐去看中醫伯伯.  因為喝下整支退燒藥水, 以她的體質, 肯定是勁虛弱, 若不喝苦茶不知要絕食多少餐.  中醫伯伯看到小姐手指的指紋都「嘩!」了一聲.  的確, 從未見過小姐有條又紫又藍的指紋在食指旁.  不過, 因著那些小瘡仍然在吊鐘旁居住, 現階段給她喝苦茶只會益了馬桶, 要待她完全康復才行.
7月6日, 牛太打算帶小姐去接爸爸機, 給牛生一個驚喜.  不過, 真的很驚喜.  在到機場的路上, 婆婆打給牛太說細小姐發燒!  幸好, 醫生叔叔還未下班, 要麻煩婆婆和工人姐姐帶她去看看.  到診所時體溫是101度, 醫生說若感染了家姐的病, 要待星期日才會知道.  若到星期日還未退燒, 就要去覆診.  牛太在地鐵裡不停跟小姐訓話, 怪責她沒有聽從吩咐.  小姐很不內疚, 生怕妹妹要住院.  此時, 牛太跟她一起祈禱, 求天父給妹妹有健康及平安.
7月7日 細小姐的燒時有時無, 並且沒有胃口吃喝.  睡得很差. 半夜還嚎哭. 結果要姐姐出動才能安撫她.
7月8日早上, 大小姐口裡的小白瘡終於搬家了.  搬到了細小姐的口裡!! 
細小姐仍然持續有燒.  牛太決定帶她去看醫生.  首先是要安置大小姐.  吃過早餐後, 把她帶到姨姨家, 然後請好朋友仔朗朗媽媽帶她到教會.  這是大小姐首次在學校之外跟朋友仔媽媽去街呀!  她沒有抗議沒有討價還價, 當媽媽向她說明原因後就一口答應.  乖女!  起初, 牛太還以為妹妹是一般感冒, 因為沒有高燒.  所以, 當大小姐見到姨姨、朗朗媽及師母時, 已經第一時間澄清不是自己把病毒傳染給妹妹的.  不過, 這個說法很快被醫生推番.  醫生看到妹妹的吊鐘旁同樣有白色小瘡. 醫生說她已經很叻女, 沒有高燒.  只是喉嚨痛令她很辛苦.  跟家姐一樣, 基本上是會自然痊癒, 不用太擔心.  牛太再向醫生問清楚是否手足口病.  他說不是, 手足口是手和腳都會出現紅疹, 而手足口是腸病毒家族的成員, 大細小姐只是感染了腸病毒, 不過仍然要隔離至少7日.  哦, 終於明白了!
病了的細小姐極度纏身, 不願睡, 常扭抱, 把爸媽玩得團團轉!
當大小組知道是自己把病毒傳染給妹妹時感到很內疚, 主動跟妹妹道歉, 還說是「唔小心, 下次唔會」, 希望妹妹快點康復.  真是傻家姐.
一星期裡, 共看了4次西醫一次中醫, 總共1300個大洋.  幸好牛太的公司是包小姐們的醫療費!

看來, 細小姐將會不斷分享家姐從外帶來的病毒.  暫時得出一個結論, 就是到細小姐上學時,抵抗力會很好呢.

細小姐的第8個月

短短的30日,細小姐已經學會由爬變坐、扶著物件企、繞著床仔行. 30 日前仍然是吞吞吐吐下吃糊仔, 今天只須15分鐘就可以把半碗吃魚粥吞到肚子裡去.  初嘗到固體食物的美味後, 現在她一見別人吃東西時必會蹼過去搶, 務必要成功討吃.  不過, 吃奶奶情況很一般, 8個月大, 每餐要要5安半, 可能她知道奶粉貴, 要替媽媽慳錢吧!

雖然牛太每日都準時回家招呼兩位小姐.  可是, 細小姐對媽媽的存在可有可無.  最重要是工人姐姐.  肚餓眼瞓定要找姐姐, 有次媽媽恨下心腸不讓姐姐餵奶, 不過細小姐亦不是善男信女, 瘋狂地喊了15分鐘仍不肯吃奶, 直至姐姐抱過手就即笑.  這些事每天都在牛棚發生.  又試過當細小姐扭眼瞓時, 媽媽帶她到廚房找愛人, 愛人不在廚房, 就自己爬到走廊去尋找幸福.  姐姐抱起她, 一臉得戚樣想打她兩巴.  上圖上排中間的那張相, 就是被困在床仔扭計要姐姐抱時影的. 

除了工人姐姐, 細小姐亦很喜歡家姐.  細小姐如在cc 起床前已經醒來, 就會肩負重要任務 -- 叫家姐起床上學.  cc 見到妹妹在她身旁就會很快起來並且不會扭計, 兩姊妹床戰一番後就轉戰客廳舌戰 - 吃包包.  閒時cc 亦很喜歡跟妹妹玩無聊遊戲, 例如在走廊的一邊大叫妹妹, 讓妹妹去追她、睡在地墊上等妹妹壓上去, 妹妹此時就會大叫大笑.  牛棚現在每天就是這樣吵吵鬧鬧, 幸好鄰居都是有小朋友的家庭, 否則定必被人投訴.

生老病死

當人知道自己生命將要完結時, 會如何渡過剩餘的日子呢? 雖然基督徒清楚明白死後會上天堂, 但仍能平心去面對將要永別家人嗎?

人能夠活到7,80歲才離開世界並不是必然的. 近年教會有位中年姊妹患上癌症, 經過化療及標靶治療後仍然沒有起色, 醫生建議她找中醫繼續治療.  聽到這個消息, 牛太心裡很難過.  姊妹有個很好的丈夫, 有兩位孝順的女兒, 本來可能多工作幾年就可以退休享福, 可是, 生命行到這裡就將要終結.

前幾天有機會跟姊妹通電, 在言談間發現她正努力求存, 盼望有奇蹟出現.

牛太作為人妻, 有時會想, 可以的話, 對方先行一步都是一件好事, 起碼傷心的是自己.  作為兩女之母, 牛太又很明白媽媽的心情, 女兒雖然長大, 會自我照顧, 可惜未能看到她們出嫁.  作為女兒的, 在未有能力報答親恩以前父母就要離開, 這是終生沒法彌補的遺憾.

牛太不敢去問她餘下有多少日子, 不善詞令加上心情替她難過, 最後只好、亦是唯一可以做的, 就是代禱.  盼望神帶領及保守這一家人, 姊妹得到最合適的安排.

大小姐之笑話(二十九)

在掃墓的前一晚--
牛太:「聽日去到公公個墓前, 同公公講, 我做左家姐啦 (下刪數十字)」
cc:「公公死左架啦?」
牛太:「係呀」
cc:「咁死左聽唔到人講野?」
牛太:「係.. 不過佢可能響天堂到會聽到架」
cc:「人死左就聽唔到其他人講野, 咁即係你想有野同佢講, 要響死前同佢講」
牛太:「都係架」
cc:「媽咪.. 咁響你死之前, 我會同你講晒要講既野架, 同埋呢, 我會好好照顧妹妹, 你唔駛擔心架... 媽咪, 咁老人家係咪死先?  你會幾時死?」
暈~~~

最近牛太買了2套Mr. Men & Little Miss 的圖書.  讀了幾本後,
cc:「我係蹦跳小姐, 我係勞氣小姐, 我係美麗小姐」
呵呵, 理解能力相當好.  並且能運用出來. 不過, 媽媽紏正她, 媽咪才是勞氣小姐, 而她是「令媽咪勞氣的小姐」才正確呀.

話說, 大小姐很希望爸爸有架私家車, 就像舅父一樣, 外出不用搭地鐵或小巴, 可以乘坐私家車.  有天大小姐忽然對媽媽說:「媽咪 我真係好鐘意你架」
牛太:「你咁想要有架私家車, 不如你同表哥交換, 你叫舅父舅母做daddy mami 咪得law」
cc:「唔好, 我第日大個賺錢買就得..我淨係鐘意你做我媽咪, 因為你無咁忙, 多d 時間陪到我, 同我玩, 教我彈琴, 整麵包同蛋糕」
聽到這堆說話, 在過去4年多, 牛太奉上所有時間給她, 是值得的.

大小姐很喜歡問, 幾多歲讀小學, 幾多歲讀中學 等等
有一晚牛太跟她逐一數
「六歲讀一年班, 七歲二年班... 十二歲中一, 十八歲大一, 廿一歲大四, 然後就大學畢業」
cc:「大學畢業就出黎做野?」
牛太:「係呀」
cc:「咁我就會買架車, 車你同daddy 同妹妹周圍去, 同埋, 買埋把風扇!」
看, 大小姐多渴望有架屬於自己的私家車呢!  至於風扇, 是因為表哥有把細風扇在車內, 小姐想借來玩, 可惜表哥不肯.  而媽咪又說這是「想要」的物品, 不是必須品, 不會買. 所以她就打算自己將來賺錢買.

爸爸:「想我湊你返學, 就快d 起身啦」
cc:「你叫婆婆湊我啦」

大小姐4歲半

在大小姐4歲生日時, 適逢媽媽在產假中, 完全沒有時間可以寫下成長記錄.  現在要好好補數.

4歲半的大小姐, 在爸爸眼中是一隻嗲精, 在媽媽眼中是一個天真活潑和懂事的小女孩, 在婆婆眼中是會關心人的孫女, 在妹妹眼中是一位對她愛護有加的姐姐, 在老師眼中是位有禮貌和自律的學生.

在3歲11個月的時候, 大小姐做了姐姐.  感恩, 她對妹妹的出現非常接受.  很樂意跟妹妹分享自己所有的.  她很有使命感, 每當妹妹哭鬧不安時, 她會給她玩具, 又或扮鬼扮馬逗妹妹笑.  現在, 她最渴望在妹妹會行後拖著她一起到公園、沙灘、泳池玩.

雖然大小姐讀的是私立幼稚園, 課程比一般非牟利學校為深.  不過媽媽不用太費時間精神去為她溫習, 只要每星期額外給她多寫兩張格仔紙練習及溫習sight word 就可以.  而在每次兒童崇拜後, 她亦都能清楚複述導師的故事.  這証明她在課堂時並沒有遊魂.   老師及媽媽偶爾會試探一下她的記性, 例如要她傳話, 她都能做到, 很少會出現左耳入右耳出的情況.  在過去兩年半的幼稚園生活裡, 牛太慶幸沒有收到老師半句的投訴.  希望, 在餘下一年多的幼稚園學習, 大小姐都能繼續保持愉快的心情, 渡過學習生涯中最沒有壓力的階段.

小姐的笑話(廿八)

牛太在小姐的中文默書簿上簽名.  牛太簽的是英文名.
cc:「呢本係中文默書, 要簽中文名先得架」
幣.. 比個女抽後腳!

正當工人姐姐拖地時, 爸爸要替細小姐換片.
牛生:「cc 呀, 唔該幫我拎張墊黎」
這時,大小姐拿來拖地時拿走的膠地墊
牛生:「唔係呢張呀, 換片果張呀」
cc:「咁你講清楚d 啦, 你淨係講墊, 我都唔知你要乜架麻」

牛太:「妹妹, 你就好啦, 一出世就有個家姐同你玩」
cc: 「你夠有咯」
我: 「你講乜呀」
cc: 「你夠有姨姨同你玩咯」
雖然調轉了來說, 不過, 反應都很快呀!

牛太收到一張繳費單, 心裡已暗暗咒罵, 並衝口而出說:「有無病呀」
cc:「你話邊個有病呀?」

牛太經常在webcam 裡見到大小姐跳梳花.  回家後經常都提醒她不要這樣做, 因為會受傷、梳化爛、或會令在地墊玩的妹妹受傷等等等等... 於是牛太就問她, 該怎樣做, 她才會記得不好再跳梳化.
cc:「不如你寫張紙貼響到, 提住唔好跳梳化」
牛太:「咁寫左之後你仲跳, 咁點罰好呀」
cc:「罰.. 唔好跳」
牛太:「就係叫你唔好跳, 乜野又罰唔好跳」
cc: 「唔準再跳咪就係罰左law...」
吹脹......

cc:「Kelvin哥哥(學校的體育老師)今日教我地彈跳呀」
牛太:「咁示範黎睇下丫」
cc「但係呢度無彈床喎. 唔怕, 我諗到一個辦法, 就係張梳化當彈床...」
牛太:「你唔駛諗呀, 乘機想跳梳化」
cc:「媽咪你又知既, 嘩哈哈哈哈!」

細小姐的第7個月

踏入第7個月, 細小姐每餐的奶量是倒退到5oz, 而且, 瞓前很多時還會玩絕食, 真是.. 辛苦晒!  已開始吃糊仔和水果蓉.  暫時最喜歡是香蕉蓉.

在6個月14日學會爬行 -- 手臂按地然後身體向前拖行.  直至這幾天, 開始嘗試用雙手托起全身爬行, 不過仍未成功, 要努力再學習.  細小姐不喜歡看baby tv, 最愛看hello kitty 卡通片.  平日看到卡通公仔會大笑, 例如新幹線, kitty, mickey 等等... 一看到自己的座駕和姐姐的印尼孭帶會很雀躍, 因為知道有街街去和姐姐會抱抱.  在扭眼瞓和心情不皆時只要工人姐姐, 其餘人想去安慰她或抱她時, 只會哭得像柺帶.  就算姐姐關上廚房門或在房間做家務, 她都會懂得爬到廚房或走廊找姐姐.  沒法子, 爸爸媽媽都是上班族, 細小姐愛戴其照顧者是很正常的事. 

在短短的七個月相處裡, 細小姐已成為牛家不可缺少的一份子.  牛太娘家將會在暑假去旅行, 原來不單止牛媽媽, 原來全家人都希望細小姐能同行, 包括大小姐.  雖然要帶很很很很多物品, 尿片奶粉babyfood 開水缺一不可, 還要爸媽在旅程上犧牲一點玩樂時間和體力去照顧她, 不過, 如果她不同去的話, 這個5日4夜之旅將會有遺憾.  向沖繩出發, Yeah!

第一套姊妹裝

這是媽媽買給兩姊妹第一套姊妹裝.  是去年在樓下商場一間執笠舖買到的, 只是$50 一件.  很抵呢!  可惜, 昨天有位小姐不合作.  影不到妹妹全身照.  要留待下次呢!

細小姐的第6個月

6個月大的細小姐, 未開始吃糊仔, 喝6安奶, 應該有8kg 重, 坐得很穩陣了.

細小姐的頭號偶像是工人姐姐, 其次是家姐;  最愛被工人姐姐抱; 最開心是看家姐做馬騮戲; 最喜歡是被爸爸抱起玩飛; 最興奮是有人回家; 最大聲是跟家姐一起鬥嗌; 最可憐是上背帶被媽媽抱瞓; 最會聽的說話是「你睇, 所有人都瞓晒啦, 你都快d 瞓啦」然後就會倒頭大瞓; 最有力的動作是玩「蜈公彈」--敞在地墊上蹺高pat pat 然後雙腳用力禁, 整個人都會彈後; 最專心看的dvd 是媽媽偶像克勤哥哥x 小交演唱會. 可能她記得在媽咪肚裡都聽過, 呵呵; 最有剎傷力的動作是十指亂爪, 臉蛋和大頭都經常可以看到其戰績.


最近的一星期細小姐經常可以由晚上9時半安睡至清晨6時多, 但願, 日日也是如是. 雖然, 要照顧兩姊妹使得父母忙過不休, 尤其半夜經常要抱睡令到媽媽練得一身好「瞓」功. 不過, 我們仍然很樂意將所有時間全部奉獻給她們, 犧牲自己的時間及興趣也在所不計. 因為, 換來的是無限x無限的快樂.

小姐之笑話(廿七)

案發場地: 洗手間
案發事件: 痾臭臭
案發經過:
牛太:「痾完未呀?」
cc:「排緊隊出黎」
牛太:「咁而家呢?」
cc:「塞住左」
cc:「而家小便... 粒燒賣借左位比d 小便行出黎....」

牛太想小姐戒掉用奶樽飲奶, 不過, 奶樽在這幾年間變成小姐的恩物.  要戒掉並不容易.
cc:「點解唔可以再用奶樽呀?」
牛太:「因為.. 係老師叫, 你地就黎升小學啦, 唔通仲用奶樽咩!」
cc:「老師幾時講架?」
牛太:「出左通告架啦, 叫家長協助小朋友唔好再用」
cc:「幾時派架, 我唔知既? 咁而家張通告呢?」
牛太:「前幾日daddy 接你放學時老師直接比左daddy 啦, 我睇完掉左啦」
牛太事後很內疚, 要用一個大話蓋另一個大話來欺騙囡囡.  不過最後都終於戒掉.
cc:「今日xx 要坐去小豬枱, 因為佢唔做功課, 寫字時騷擾人」

牛太:「咁你係咪聽日去坐小豬枱?」
cc:「緊係唔係, 我響學校好乖架, 唔駛坐小豬枱」
牛太:「呵呵, 你都知你只係響學校乖, 響屋企就唔聽話」

cc:「緊係唔係, 我成日都乖架, 係你話我唔聽話之麻」
牛太:「你一陣可唔可以陪我去超巿, 我想睇下d 芝士有無減價呀」
cc:「好呀, 去taste 呀?」
牛太:「唔係.. 太古城都無taste 既, 去aptia 呀」
cc:「咁中文名叫乜」
牛太:「無中文名架, 得英文名叫aptia. 你點知aptia 係英文」
cc: 「因為..a a a.. 咪a sound law」



cc:「我想試下行山呀, 行山係點架?」
牛生:「行山呢就咁咁咁, 會見到咁咁咁」此時, 電視正在播著特首投票.
牛生:「呀, 不如我下次帶你一齊去遊行, 我以前都去過, 因為諗起我既下一代.... 下刪一百字」
cc:「我唔係想去遊行呀, 我係想去行山呀, 你明唔明呀, 唉!」
笑到牛太反肚

過去的一星期

上星期四晚起, 牛太親自將細小姐接管, 原來發現, 細小姐是很正常的.

第一晚, 一向不愛被媽媽抱睡的細小姐, 在鐵碗政策下, 足足瘋狂地喊了45鐘才入睡, 由於是牛太親手抱她瞓, 故此半夜醒來也願意被媽媽抱, 再沒有抗議. 第二晚, 她抗議了30分鐘.  第三晚, 是15分鐘, 到四晚, 喊了幾聲就睡去了.  可幸的是, 她的肚痛已痊癒, 不幸的是, 傷風降臨在她的身上.  更不幸的是, 牛太每晚半夜要替她吸鼻數次.  更更更不幸的, 就是全家人都被細小姐癲狂的喊聲吵醒.  哈哈.

如果不是工人姐姐說出口半夜要照顧細小姐至身心疲累, 很可能牛棚到今天仍是上星期的狀態 -- 細小姐只要工人姐姐.  幸好, 當牛太決心要為女兒戒毒時, 發現原來gg 是要一個可以讓她安睡的環境, 而不是要欽點姐姐來照顧.  雖然要半夜起來照顧女兒, 身體有點累, 不過這也是一件好事, 就是在細小姐還小時, 提醒著做媽媽的我, 不要將責任外判, 將來女兒大了才知道誰是媽媽.

細小姐的第5個月

過去的一個月, 細小姐在凌晨時份變成惡魔 --  一隻飽受肚痛困擾、不要爸媽只要工人姐姐的惡魔.
惡魔起初是半夜突然哭, 媽媽抱著她瞓就可以.  過幾天後, 她只讓爸爸抱, 媽媽想接力時只會聽到像被拐帶的嚎哭聲.  然後, 又過幾天, 爸爸連夜奶的工作都要被迫判給工人姐姐, 根據爸爸的說法是, 小姐要見到姐姐才肯飲奶!  接著是, 半夜哭醒後一定要姐姐抱才肯瞓.  爸媽試過將她鎖在廁所由她哭, 心想是, 累了就會睡吧!.  怎料她不停地哭了2小時, 直至工人姐姐忍不住拍門, 轉手抱她, 她就即時笑然後睡在姐姐的懷裡.  結果, 累得幾個大人都叫苦連天.  固此, 由昨晚開始牛太決心要幫細小姐戒毒, 晚上11時後餵奶哄睡的任務由媽媽一手包辦, 目的是, 就算是半夜因肚痛好、嚇驚好都可以由媽媽處理, 不用勞動日間要全力照顧細小姐的工人姐姐.  
昨晚,她吃完奶後就想睡, 不過, 睜開眼後見到不是頭號偶像--工人姐姐時就放聲嚎哭, 牛太只好抱著她由她哭, 直至45分鐘後她就投降了.  可能是昨日喝過苦茶奶奶做了個超級大及臭的大包, 將體的垃圾及不適掃走, 昨晚是難得沒有哭聲的晚上.  雖然是夜一點才可以瞓, 不過總比整晚都要聽到喊聲還好.  牛太期望慢慢替她建立正確的睡眠模式, 不久將來可以在房間餵奶然後跟家姐媽媽同睡一房.
雖然晚間是惡魔, 但在日間卻是牛棚另一隻的小天使.  小天使見到家中各人會笑, 最開心當然是見到工人姐姐, 其次是家姐, 特別喜愛看著家姐在跑跑跳跳.  小天使於10天已經學會坐, 轉身後更嘗試向前爬.  見到媽媽拿起相機, 就會瞄準鏡頭笑.  很快, 下個月就可以品嚐固體食物, 期望到時可以減輕濕疹的出現.

小姐之笑話(廿六)

一晚在穿梭lift 裡, 牛太告訴cc:「你大個啦, 唔可以再玩尿布秋, 要去寶康公園玩小朋友秋」
cc:「點解呀.. 咁8歲玩唔玩得小朋友秋? 咁20歲呢?」
牛太:「玩得, 但到你20歲時你唔會玩架啦」
cc(失落地):「點解喎, 咁好玩... 咁.. 媽咪你係咪20歲啦?」
全lift 人在偷笑

小姐在超巿見到有火龍果, 忽然興起說想吃.  但牛太見沒有特價之餘又細個, 所以隨口想了個籍口說火龍果不太新鮮, 下次才買.  誰知小姐說:「咁唔靚點解呢個姐姐又買既?  媽咪, 呢個咪靚law」
所以呢, 對著駁咀王要誠實, 否則隨時被她將軍.

星期六早上趕著要出門, 牛生一邊穿鞋一邊跟細小姐玩
cc:「daddy 呀, 專心d 著鞋啦, 我著好啦, 等緊你咋」
daddy: 「知啦, 著緊啦」

不過, 有人仍然在跟妹妹玩
cc:「daddy 呀, 都話專心d 咯!」
有晚牛太關燈後見小姐的襪仍在地上, 訓了幾句話後就連同自己的襪帶進廁所, 牛太把自己那鞋破舊的掉進垃圾桶, 小姐的則放進污衣籃.  當小姐聽到有物件掉進垃圾桶後就很緊張, 她以為媽媽掉了她的襪, 就摸黑走進洗手間.  最後發現原來自己的襪在污衣籃裡, 笑笑了就走上床睡覺.  這女兒心水很清, 不用親眼見就知道有什麼事發生. 

小姐又表示將來不想結婚, 因為不想跟父母分開居住.
牛太:「以前婆婆、媽咪、姨姨、舅父都係一齊住架, 你睇, 姨姨結左婚後都無同婆婆住啦」
cc:「咁你夠同婆婆住啦」
噢, 牛太又講錯說話.
牛太:「婆婆老啦麻, 要照顧佢」
cc:「你老左我都要照顧你架」

學校功課中有張工作紙要完成. 
牛太: 「呢度係乜架?」
cc「姓名, 即係我個名.  我可唔可以寫Aileen?」
牛太:「緊係唔得啦, 呢個係中文功課, 寫英文名要等做英文功課先」
隔天牛太放工回家, 小姐即刻展示自己做完的功課
cc:「我寫左名啦--鄧晴」
牛太:「個曦字去左邊?」
cc:「唔駛啦, 鄧晴都得架啦」
牛太:「你改左名叫鄧晴咩?  有人叫你做鄧晴?」
cc:「你咪成日叫我做鄧晴晴law」
blogspot 沒有表情符號, 否則這裡要出一個趴在枱面然後加""" 的公仔

有晚跟小姐討論死亡
cc:「我唔想你地第日死呀」
牛生:「人老左自然要死架啦」
cc:「咁咪應該婆婆死先law」
幸好, 婆婆當時聽不到!

小姐之笑話(廿五)

婆婆: 「邊個係浩然呀?」
cc:「沖緊涼果個law」
這是小姐很少有用的間接答案.

有晚牛太放工後到畫室接放學. 下課前老師叫他們去排隊洗手. 小姐剛巧坐在外排, 很快已經行了出去. 鄰座的女同學想打尖, 但小姐用雙手欄著她, 不讓她行在前面.
牛太:「你頭先係咪同小朋友爭排第一呀?」

cc:「我無同人爭呀, 係佢同我爭咋.. 我本來就係排第一」

牛太想一想, 她又的確沒有答錯. 不過牛太不想她凡事都要爭第一, 於是引導她說出排第二的感受.
牛太:「 咁排第二會點呀, 點解你鐘意排第一既? 」

cc: 「排第二咪遲d 先放得學law.. 我想排第一都係想快d 見到你」
這是遇期不到的答案. 
有天晚上牛生告訴小姐因為公司話電腦壞了, 所以要OT, 要很晚才回家.
牛太:「電腦壞左, 關daddy 乜事?」

cc:「daddy 要整law」

牛太: 「daddy 既工作就係維修電腦 」
牛太: 「咁醫生既工作係做乜?」然後繼續問警察、郵差、消化員、舅父、姨姨、姨丈的工作, 她的逐一答對.
最後, 牛太問:「咁媽咪係工作係乜 ?」
cc: 「整麵包, 整蛋糕, 織冷衫 」

cc:「媽咪, 我變d 魔法閃粉比你丫」
牛太:「無既」
cc:「因為你都無買魔術帽同魔術棒比我, 所以咪變唔到law」
於是牛太就假裝替她戴上帽子和給她魔術棒
cc:「變變變, 魔法閃粉」
牛太:「都係無既」
cc:「因為你比左頂假帽同假棒我, 所以我咪變d 假既比你law」

細小姐的第四個月

踏入第四個月, gg 的體重粗略估計是15磅, 這有代星期四到健康院打針時証實.  至於食奶量則於過去幾天加至五安半. 時間方面已經很穩定了.  只是有時生理時鐘稍為行快了, 晚上11時後絕食然後到半夜來找奶奶, 苦了要上班的爸媽.

過去的一個月, 細小姐要欽點工人姐姐餵奶及抱瞓, 她可以以絕吃絕瞓和喪喊去換取姐姐一抱. 結果, 週六晚時被媽媽鎖上房門後恨恨地教瞓一頓, 最後, 她不停地喪喊半小時至面紅耳熱後睡去.到星期日呢, 可能整天沒有見到姐姐出現, 要吃要睡時就很乖乖地在爸媽懷裡就範.  看來牛太每晚都要對細小姐進行地獄式戒毒, 否則星期日耳根休想安靜.

不單止牛生牛太, 就連大小姐都渴望妹妹快點長大可以一起去玩.  妹妹呀妹妹呀, 可以帶你去玩都是媽咪一個心願, 最重要是希望你半夜要好好跟周公談心, 讓爸爸媽媽可以好好地瞓覺呀!

小姐之笑話(廿四)

在往溜冰場的路上, 牛家大小姐爆了好幾個笑話:

cc: 「頭先出門口前, 我整緊曲奇餅架, 爭焗就得」
我:「咁放去邊度焗」?
cc: 「焗爐law, 但我無焗爐喎, 點算?」
我: 「咁放入電飯煲焗啦」
cc: 「唔得架, 電飯煲只係電d 飯出黎, 電唔到d 曲奇出黎架」
原來, 飯是電出來的.....
到達太古站, 小姐眼見很多人已下班.
cc: 「好多人放工啦, 應該得我個daddy 係未放工」
牛太:「係law, 點解daddy 成日都要ot」
cc:「因為佢做得慢law」
牛太:「咁點解咁慢呀」
cc:「因為佢無用我個腦袋law.. 我借埋個腦袋比佢, 佢就會快d」

在回家的路上, 每次去到鰂魚涌站小姐都會打電話給daddy報告行蹤.
牛生告之小姐已放工並且回到家.
cc: 「我地而家到.... 睇下先.. 呀, 係油塘站啦」
掛線後, 有個路人甲讚她叻女, 年紀少少就能看字.
cc: 「其實我唔識油塘呢兩個字架. 只係見到係兩個字, 咪知係油塘law.. 同埋, 鰂魚涌下一個站咪油塘law」
然後, 牛太問小姐: 「咦, daddy 今晚唔駛ot 呀?」
cc: 「係呀, 佢放左工啦!」
牛太: 「點解今日唔駛o 既?」
cc: 「因為我借左個腦袋比佢, 佢咪做快左law」
好一個自編自導的故事呀!

小姐之笑話(廿三)

細小姐因為鼻塞以至睡得不好, 零晨4點突然大喊, 牛太為免她嘈醒大小姐, 所以抱她出廳. 
牛太: 「點解你瞓瞓下知道我出去抱妹妹」
cc: 「因為腦袋話我知架law」
牛太: 「腦袋點會知」
cc: 「因為佢有眼睛, 見到然後話我知?」
牛太:「下, 你腦袋有眼睛?  唔係瓜」
cc: 「係呀, 因為我個腦袋係怪物架麻」

大年初一因為時間關係, 今年牛家沒有到舅父家中拜年, 大家直接在餐廳裡「解決」各項拜年的動作.  事後, 表哥跟舅父說很不開心, 因為cc 作為「後輩」沒有到他家中拜年.  於是牛太就建議cc 打電話再跟表哥拜一次年.
cc:「我咪拜左年law」
牛太:「幾時呀」
cc:「響餐廳呀, 我祝左佢快高長大, 學業進步架啦」
牛太:「咁可能係表哥唔記得左, 你再講多次啦」
cc:「唔打呀, 講一次就得, 唔駛再講架啦, 你教我架麻, d 野講一次就好, 唔駛咁長氣」
這兩表兄妹真是一擔擔, 平時小姐明明很喜歡和表哥煲電話粥, 今次又突然玩有性格!

cc:「主耶穌會唔會再放個bb 落你個肚到架?」
牛太:「唔會架啦, 你都有妹妹陪你, 唔駛多個啦, 一間屋咁多小朋友, 咪好嘈, 嘈到你睇唔到電視」
cc:「等我諗下辦法先... 腦袋諗到啦, 一, 一係叫佢地唔好嘈, 第二就係較大聲d 個電視機」
咁都叫辦法???

牛太:「你又唔記得沖廁所啦」
cc:「腦袋瞓左覺, 等我拍醒佢先!」

牛太忘記了什麼事請小姐想辦法
cc:「好, 等我諗下先.  諗諗諗諗諗.. 諗唔到!」

牛太把清洗好的揹帶收好.
cc: 「點解要用呢條既, 唔係用布(印尼式揹帶)果條」
牛太:「用黎揹妹妹用, 因為媽咪唔識用姐姐果條」
cc:「好易之麻, 拿, 摺好條布, 然後, 放上黎右邊既膊頭, 記住呀, 係右邊, 然後咁樣卷卷卷, 跟住放bb 個pat pat 響呢度, 然後又再卷卷卷, 咁就得架啦」
牛太很很很佩服她的觀察力, 完全沒有人告訴她是如何用印尼式揹帶, 她就是憑平日見工人姐姐的做法然後輸入了電腦.  所以呢, 做父母的千萬不要行差踏錯, 否則小姐就有樣學樣.

牛太:「 你讀中學時, 可以同d 同學仔去街, 唔駛痴住媽咪架啦, 到時你都唔鐘意媽咪跟住你」 cc: 「 我會自己去街, 但都會好鐘意你架. 第日呢, 我結左婚, 都會好鐘意你, 好似你咁, 生左bb, 都會好鐘意媽咪架. 」
聽到這一句, 很感動. 雖然未知這是否空頭支票, 但這一刻是真的, 是發自內心的. 就算她氣得你多生氣, 聽到這幾句, 甚麼辛苦勞氣都一掃而空.

第一次總動員

龍年的大年初一, 牛家終於都全體出動去拜年.  細小姐由出世至今, 除了去過健康院和家姐學校接放學外, 都未曾去過其他地方.  正所謂貴人出門招風雨, 細小姐一出門就遇上可能是全年最凍和下雨天.  中午時份, 牛爸爸抱著包到只剩下鼻孔的細小姐、媽媽拖著大小姐到爺爺麻麻家打場白鴿轉後就打道回府作中場休息.  傍晚時份就轉戰太古城.  多得兩位小姐合作,  勞碌了整天很累, 但總算順利, 細小姐沒有扭計, 並且在夜晚大合照時間醒來影相, 使得牛家有第一張在牛棚以外的全家福.

未知下一次總動員是在何月何日, 不過肯定的是藍天白雲的日子.

細小姐的第三個月

- 上個月到健康院度高磅重, 體重是預期中的事, 5.64kg.  而身高, 相比出世前高了10cm, 難怪, 所有夾衣都變成三、四角骨. 

- 由第二個月開始, 細小姐被便秘困擾.  在2011年最後的一天, 牛太終於帶她去看中醫伯伯, 喝過幾支茶茶奶後仍然沒有好轉, 便的起心肝轉奶粉.  終於, 便便得以暢順及面上的粒粒都消退了.

- 由於牛棚仍然積存數盒舊奶粉, 牛太起初打算每天給她喝一餐直至吃完.  怎料在轉奶粉的十天後, 細小姐拒絕進食, 她用盡全身的力將奶樽扔開, 然後大喊, 直至品嚐到是新奶粉後才肯喝下去.  牛太只能說, 兩位小姐在吃方面好有性格!

- 轉奶粉前是每餐5.5安士, 轉奶粉後是4,5安士.

- 要捕足妹妹的笑臉一點也不難.  這三個月以來, 她只有在肚餓及眼瞓時會哭, 醒來見到人總會笑, 最近還學會「er er」跟人談話, 所以, 身為細小姐的她絕對不會被冷落. 

- 雖然不能要求細小姐在沒有要求吃奶的時候給她奶奶, 但她也建立了一個吃奶作息的時間表:

早上6時半-7時吃奶後繼續瞓, 到10時半至11時左右起床, 然後洗白白, 吃奶, 玩一陣後再瞓, 4小時後就吃奶, 睡至晚上7時左右, 知道有人回家, 就不願再睡, 一直玩玩坐坐抱抱到10點後吃奶然後入睡.  好彩的話, 爸媽可以大覺瞓, 但間中細小姐也會半夜醒來找奶奶.  希望, 這個習慣盡快終止, 讓爸媽可以瞓得好一點.

家姐錫妹妹記(一)

自細小姐出世以來, 大小姐反定律地沒有呷醋, 連半點也沒有.  作為媽媽的, 好應該將家姐的行為對話記下來, 讓妹妹長大後知道家姐由一開始已經很疼她.

-大小姐很樂意為妹妹服務, 包括換片、開奶、沖涼、陪玩.  細小姐一哭, 大小姐第一件事就會走到她身旁並說:「唔駛驚,家姐響到、唔駛喊啦, 就黎有奶奶食」;無論在公園、 clubhouse、溜冰場等等地方, 見到別的孩子兩姊妹在玩時, 她總會表示:「妹妹大個d 時我會帶埋佢一齊玩, 教佢玩.....」

-牛媽媽經常會問大小姐以下問題
牛太:「你覺得媽咪錫你多d 定妹妹多d?」
cc:「2個」
牛太:「咁邊個多d?」
cc:「都話2個都咁錫咯!」

牛太:「我有幾多個心肝寶貝?」
cc:「2個囉」
牛太:「係咩? 我成日以為一個」
cc:「我係大心肝寶貝, 妺妹係細丫麻.. 你咁樣都唔記得架, 你叫你腦袋幫你記住先得架」

-有次牛太想試探下大小姐
牛太:「妹妹成日喊, 不如我地送佢返醫院, 等護士照顧佢, 大個先帶佢返黎啦」
cc:「唔好啦, 我會好掛住妹妹架」
牛太:「不如我地唔好錫妹妹啦」
cc:「點解呀」
牛太:「佢都唔識, 咁等佢大d 先錫返佢law」
cc:「唔好啦, 咁佢無人錫咪好唔開心law」

-有日牛太對妹妹說:「妹妹, 你好可愛呀!」說了這話後, 心想:「死, cc 會唔會唔鐘意呢?」誰知cc 就回應:「係囉, 我都覺得妹妹好可愛!」呵, 原來是媽媽小人之心.  不過最後都補充一句:「咁家姐都好可愛架!」

-話說, cc 很喜歡爸媽陪玩.  不過自gg 出世後, 陪玩的時間相對地少, 而爸媽都會盡量抽時間陪她.  然後, 每當爸媽忙著要照顧gg 時, cc 是不會埋怨或強行強迫父母放下妹妹去陪她, 她會等待妹妹吃奶/安睡後才會再作出要求. 

多得大小姐的合作, 這使得牛爸牛媽在照顧兩姊妹時心情輕鬆很多.  期望,大小姐繼續努力錫妹妹!

兩表兄妹

在聖誕期間, 大小姐很多的戶外活動都與表哥一同參加.  這兩個孩子長大了, 帶他們外出一點難度也沒有, 並且, 牛太發覺, 兩個小孩子會互相牽制, 比平時教導一個大小姐還來得容易.  眾所周知, Edwin 和cc 吃飯的速度和食量是叮噹馬頭.  不過, 當他們一起用餐時, 大部份時間都能在半小時內完成.  因為, 誰都不希望慢過對方.  而且, 沒有安份坐在飯椅裡的, 定會被對方責罵, 故此, 雙方都能安份地吃畢整頓飯.

又好像有一天,帶他們到康怡新開業的playroom, 一來牛太自覺年紀大, 不想再跟他們爬上跑落, 二來, 他們是玩伴, 好應該教導他們互相照顧.  於是牛太就叫他們要一起玩, 玩時還是互相幫忙及照顧.  結果他們都做得到.  離開playroom後, 要經過吉吉島的玩具店, 為免他們要扭看扭買玩具, 牛太又向他們說出規則, 就是不可停在玩具前, 要手拖手向前行, 才可到超巿買飲品, 其中一個不守規矩的, 大家都不到超巿了. 牛太問:「做唔做得到?」Edwin & CC: 「做得到!」在路上, 兩位小朋友不停互說:「我唔睇玩具架, 你呢?」「我都唔睇架, 我唔鐘意睇玩具架!」到了玩具架前, Edwin:「CC 我無睇玩具, 你呢?」CC: 「我緊係無睇啦」事實上, 牛太很清楚小姐, 如果沒有表哥的話, 她肯定是停在玩具層「賴死唔走」.

還有一段搞笑對話要記下.  話說, 去playroom 那天, 牛太為了肯定小姐肯午睡, 唯有帶同腸腸一起到表哥家. 

CC:「表哥, 我帶左腸腸黎呀.」

Edwin:「我都未見人4歲仲要用腸腸.」

CC:「咁我瞓瞓下會驚架麻, 咪要腸腸陪我law.」

Edwin:「驚就應該去搵個人, 唔係搵條腸架麻.」

看著他們互相照顧、互相幫忙, 心裡很感動.  但願, 長大後亦是這樣.

瘋狂的2011年12月

2011年的12月, 適逢牛太仍在產假中, 牛太和大小姐遊玩了香港九龍新界.  我們到了廸士尼、小白鷺、農場、playhouse、bbq、太空館、尖沙咀、旺角, 又與朋友同學團聚. 曾經有幾天連續在太古城出現及活動, 那一刻有點想在Edwin 家借宿一宵.  雖然, 這個出沒量相對其他家庭是小毛見大毛.  但對於牛宅來說是前所未有.

玩樂過後, 大小姐在29日突然發高燒.  以至在31日的lunch buffet 也要順延一星期, 讓小姐休息多點、 叉好電後收拾心情上學.