溜冰記

牛太已經忘記小姐是何時開始要求學溜冰.  大概時今年復活節左右吧!

暑假前, 牛太得知溜冰學校會有summer course, 價錢又不算太貴, 時間上又可以配合得到, 便替小姐報名參加.  但為了顯示她對學溜冰的熱誠, 牛太開出了三個條件, 要做得到才會讓她參加.  第一, 是午睡時不用姐姐陪.  二.  參加兒童崇拜亦不用媽咪陪.  第三... 牛太忘記了:p.  要獨立生存是小姐的弱項, 三歲半的她, 仍然很希望媽媽可以陪上兒崇.  估不到, 因為可以溜冰, 她一次過戒掉了兩個習慣.  既然她做得到, 牛太亦遵守承諾, 讓她學習溜冰.

6堂的暑期班分別在兩星期內進行.  爛玩不怕死的小姐在第3堂己經掌握到平衡, 不用扶著欄在場內溜來溜去.  跌倒就算痛也沒有哭, 站起來後又再玩過.  6堂過去, 小姐當然希望繼續學.  但這是一個很頭痛的要求.  如果不是妹妹快出生的話, 平日下午大可以要求姐姐帶她到溜冰場.  但到妹妹出世後, 難道要姐姐帶著兩個小孩乘地鐵到溜冰場嗎?  幸好, 教練安排到在週二晚上7時上課, 這樣, 姐姐或婆婆只要帶小姐到油塘站等媽咪, 牛太就可以帶她去上堂.  不過, 在上堂前, 牛太又提出了要求. 就是她在兒童崇拜將要升班, 而教會亦安排在崇拜的後半段將要升班的小朋友帶到新的課室, 讓他們適應一下.  牛太要求她在轉班時亦不要媽媽陪, 能夠和其他小朋友一樣, 獨個兒參加崇拜.  轉換新環境又是小姐的弱項, 這是兒童崇拜導師們都知道的.  誰知第一次轉班她很快便適應, 新班的導師還以為她本身就是很獨立.  看來, 溜冰的威力真大.

過去的星期二是小姐重新上課的日子.  是一個她期待己久的日子.  平日, 她午睡起碼要個半小時, 還要姐姐不停叫她才肯起床.  那天, nap 了一小時就自動彈起, 她告訴媽媽: 「你平時話呢, 午睡唔好瞓咁耐, 唔係夜晚就唔瞓, 瞓一個鐘就好啦!  我今日有聽你話呀!  我頭先打比daddy, 話比daddy 知, 我做完功課就換衫出發架啦!」出發?  不是吧, 才三時多, 要六點才出發呀!  在這三小時內, 牛太都計不到她撥了多少個電話給媽媽.  大概是五分鐘一次.  最後牛太唯有打發她去看電視, 電話才停下來.  不過根據婆婆的報告, 她看電視時都心不在焉.  牛太在往油塘的路上, 又收到小姐的話:「媽咪.. 點解你咁耐仲未放工架, 我好掛住你呀!」媽咪:「你掛我.. 帶你去溜冰麻.. 我走左架啦, 你都可以出發!」然後, 電話筒傳來一聲尖叫聲 -___-".  在油塘接過小姐後, 牛太問她餓不餓, 她說肚餓, 牛太表示有麵包給她吃.  但她的心己經飛到冰場. 當她聽到地鐵的廣播: 「下一站係quarry bay」就說:「我唔食住啦, 等落車先啦」「好耐先到站架, 食少少啦」「唔好啦」不過可能太肚餓, 轉頭要求媽媽給她麵包.  吃了一口後又說「等落車先食啦」.  如是者, 分開幾次咬了數口麵包.  到達太古站後, 她本來又要求吃包, 但後來又說等到入溜冰場才吃.  誰知, 在路上她又分開數次吃了餘下的包.  作為媽媽的, 覺得她很好笑, 但又顯示出她真的很期待. 
換上鞋後還未夠鐘上堂, 於是便讓她進場自己玩下.  個多月沒有練習, 起初還是不習慣, 不過不到十分鐘, 她己記得應該怎樣做, 果然是一隻爛玩精.

雖然婆婆經常投訴這活動很無謂, 將來妹妹出生, 牛太要放下妹妹給工人姐姐照顧然後帶小姐去堂, 這些課外活動可有可無, 讓她去學游水或跳舞都是一樣.  而究竟她為什麼會愛上溜冰呢? 完全不得而知. 為何在一個固定範圍內溜來溜去就覺得很開心呢? 穿上溜冰鞋後腳又痛又不志在. 不過, 牛太覺得, 概然她是如此喜歡, 能力範圍又不是做不到, 就讓她學習吧!  其他運動, 都要她願意, 否則她很易半途而廢.  雖然至今牛太仍不明白溜冰的好處, 但明白及回應女兒所想所要的, 是她真正擁有的幸福.

小姐之笑話(十八)

有日在太興吃下午茶, 牛生點了公仔麵, 牛太向小姐介紹這碗叫公仔麵.  小姐的即時反應是: 「都無公仔既, 點會係公仔麵呀!」

k2 開學後, 小姐在學校午膳的速度很慢, 上學期是1時半前會回到牛棚, 現在很多時都要1:45, 有一天甚至是1:50.  回家後, 小姐致電媽媽說: 「我想睇完電視先瞓呀!」為免養成這個習慣, 牛太斷然拒絕, 並說:「如果你唔眼瞓, 就請你返學校繼續上英文班啦」cc: 「我唔係唔眼瞓, 我都眼瞓, 但個問題係呢, 我想睇完先瞓.」牛太在電話的另一邊已經笑到反肚:「咁我話個答案你知, 總知2點就要去瞓, 如果唔係就叫姐姐帶你返學校架啦!」這位小姐確實很須要明確的指引, 清楚給她下定界線.  結果, 2時正她就關掉電視午睡去.

中秋節的前夕, 牛太與娘家家人做節, 晚餐的main course 中有薯條, 這本是小姐的至愛, 可能她已經吃得很飽, 當表哥請她吃時她亦無動於衷, 表哥問牛太cc 為何不吃, 牛太說: 「一來佢飽啦, 二來我地今日中午食左麥叔叔, 1日食1次薯條都好夠架啦!」小姐立刻插咀:「媽咪, 咁點解你又食呀!」所以這証明, 在小孩面前, 身教實在很重要, 言教跟身教不配合的話, 他們是會知道, 並且以後不會聽從大人的說話.
晚飯後, 大家一起到商場的最頂層去取雪糕月餅.  她一邊行一邊說:「點解咁耐仲未到架!」因她實在很心急想取得雪糕.  牛太回應:「要食就緊係要付出下架啦, 唔係邊有得食呀, 呢個世界不勞而獲架.」小姐突然爆出一句:「媽咪, 我覺得你講得好岩!」

為了令小姐肯去嘗試吃不同的水果, 媽媽讓她在超巿裡自行買一款未吃過的.  她的即時反應是:「唔係一定要買水果架麻, 買其他野新野都得架」牛太實在很明白女兒的鬼主意:「我知丫, 你最想買d 未食過既糖、朱古力同雪糕丫麻, 呢d 係你既至愛」小姐:「哈哈哈哈, 我真係好鐘意食呢d野架!」
自從暑假時上過溜冰班後, 小姐更加愛上溜冰.  為了可以繼續上堂, 她把媽媽發出的條件一一做到.  但學溜冰實在很花人力, 畢竟這不是在牛棚附近可以學到, 每星期都要安排人手帶她去上堂. 為了使她死心, 牛太多次問她, 不如學跳舞, 都是一樣吧!  但小姐始終是選擇溜冰.  有天, 她對媽媽說: 「我想兩樣都學喎!」牛太:「唔得喎, 學一樣就夠啦!」小姐又發揮鐵咀雞的本色:「咁我仲有學畫畫, 同埋你又話要學英文, 都唔止一樣啦!」

妹妹的新衣

再一次証明, 香港實在是物資氾濫的地方.

左邊的衣服, 單是襪都超過60對, 有許多還是新的.  和尚袍和初生夾衣分別都有超過50件.  足足足夠2個初生嬰兒所需.  這些物主主要是來自牛太的兄妹及大食怪太太妹妹的朋友.  最搞笑的是, 有部份是cc的初生衣服, 之後轉手給意粉和虎虎.  現在又回歸予細小姐, 更有趣的, 有幾件是Edwin 穿過的, 然後到cc, 接著是意粉, 現在又落在細小姐身上.
經過一輪執拾, 牛太把3大袋衣服回贈給阿哥.  因為他的學生也快將加入為人父母行列.

天父的預備很足夠, 今次, 牛太連一件衣服都不用買.  感謝主!

小姐之笑話(十七)

有個週末, 在會所泳池游完水後,
牛太對小姐說: 「唔入更衣室換衫啦, 包條毛巾, 等daddy 抱你快快趣趣上返去, 因為要趕住去睇中醫呀!」
然後, 待牛生抺好身穿衣後, 就叫小姐: 「行啦」
小姐: 「你抱我呀, 媽咪話快快趣趣呀!」
回家洗白白時, 牛太向她解釋, 因為泳池水很多細菌, 所以回家第一件事就要沖涼.
小姐: 「咁第二件事呢?」

當牛太的肚一日一日大, 小姐黏身程度就與日俱增. 牛太估計, 當妹妹出世後她, 她會更加黏著媽媽. 於是牛太告訴她: 「第日邊個得閒湊你去學畫/音樂堂就邊個湊, 無得揀呀!」 小姐, 想也不用想就說:「或者妹妹唔鐘意媽咪呢!」牛太的轉數不及女兒快, 還回應: 「係law, 或者佢鐘意daddy 抱呢」小姐: 「係law, 佢唔鐘意媽咪架!」

有日, 牛太透過webcam 見到小姐在看電話. 於是致電回家
牛太: 「cc, 你做左功課未呀?」
cc: 「未呀」
牛太: 「咁仲唔做? 你都睇左好耐電視啦喎」
cc: 「我想睇完電視先呀」
牛太: 「陳老師有無同你講, 要做完先玩」
cc: 「我諗下先... 佢唔記得講」
牛太: 「咁k1陳老師都有教你架」
cc 「咁k2 陳老師無講丫麻」


cc: 「表哥學畫畫, 我又有學畫畫; 表哥學溜冰, 我又有學溜冰; 表哥學琴, 我又有去學琴; 但表哥學游水, 我就唔想, 媽咪, 我想學跳舞.」
牛太: 「你諗清楚, 想學跳舞定溜冰, 是但揀一樣」
cc: 「因為點解呀? 我想兩樣都學喎」
牛太: 「一來無咁多時間, 二來我無咁多錢」
cc: 「咁叫舅父比law!」
事源是, 小姐的暑期溜冰班是舅父代為執名及繳交學費. 所以, 小姐以為其他的課外活動都可以叫舅父交.

小姐之笑話(十六)

在飛機上, 牛太趁空檔敷面膜.  小姐第一次見媽咪如此舉動, 嚇傻了, 不停要求媽咪除下來.
前幾天, 牛太與小姐在油玻璃彩(質地有點似水彩), 用白色塗在太陽伯伯的臉上.  小姐說: 「媽咪, 太陽伯伯好似你敷mask 咁呀!」


cc: 「媽咪, 陳老師教我地要互相尊重」
牛太:「咁你知唔知尊重點解呀」
cc:「唔知呀」
牛太:「即係例如, 你想請媽咪食糖, 媽咪唔想食, 我知你想同我分享, 但媽咪可能唔舒服, 可能飽, 唔想食, 咁你唔好迫我, 係都要我食.  咁就叫尊重啦」
cc: 「咁下次呢, 我想食糖, 你就要請我食, 唔好唔比, 咁即係尊重啦!」
..............................

cc:「媽咪, 我唔想我大個時你就死呀... 我想切埋蘋果比你食先呀! 」
話說, 牛生曾經告訴她, 她長大時, 父母就老了, 要返天堂跟耶誕一起住.  另外, 她經常要求想自己切蘋果.  牛太告訴她, 升小學就可以做.  於是, 小姐將兩者聯起來.

牛太「快d 飲埋d 涼茶啦」


cc:「唔好啦, 一陣先」:
我: 「咁即係幾時」
cc: 「一陣就係一陣」

cc: 「媽咪, 點蟲蟲, 蟲蟲唔識飛架, 蟲蟲係爬架.  我要話比姨姨聽, 叫佢唔好再教虎虎點蟲蟲, 蟲蟲飛, 咁樣會教壞虎虎架!」

搭lift時最好先找個麻包袋袋好小姐, 又或者封著她的咀巴.
小姐看到2個哥哥和他們的父母入lift
cc: 「點解佢地咁大個仲用水泡既」
牛太只好說: 「佢地鐘意用law」

小姐之笑話(十五)

有位小朋友想扭媽媽買玩具.
媽媽:  我無錢啦, 買左貼紙比你, 又有夾夾
cc: 咁你日日都有返工架麻, 應該日日都有錢架麻!

又一次想媽媽買東西
媽媽: 我銀包無錢啦
cc: 咁去銀行禁啦!  呢, 果度就係銀行!

有天小姐穿起球衣.
媽媽: 記唔記得係邊隊球隊..
cc: 唔記得.
媽媽: 巴
cc: 巴斯光年隊!

有天牛太帶同小姐去產檢. 之後又要帶她看兒科.
媽媽: 不如一陣你叫醫生開埋藥比你咪得law, 咁我唔駛又帶你去睇醫生.
cc: 唔得架! 我個肚都無bb, 一陣比醫生知道會鬧我架!
最好笑是, 牛太從沒有提過那是個婦產科醫生, 是她自己從觀察知道的.

沙巴之旅

計劃這次旅行, 緣於妹妹將要出世, 接下來的兩年都未必可以遠行, 所以趁著暑假, 帶小姐到一個比較安全及舒服的地方玩幾日.  牛生牛太好幾年前曾到訪過沙巴, 回想這裡是小朋友渡假的好地方, 只要住近巿區的resort, 就不用舟車勞頓, 這也適合懷孕中的牛太.  牛太又特別每天只安排半天活動, 例如第二天早上出島玩, 下午午睡後就到巿區逛逛和醫肚, 第三天則是早上在resort 裡hea, 待小姐叉電後下午乘車到郊外看螢火蟲,. 這樣大人又不用辛苦, 小朋友叉好電後不會扭計.

經過今次旅行, 牛太發現cc 長大了不少:
- 由於早上8點的航班, 即使乘的士到機場, 亦要5時半起床, 幸好, cc 天生爛玩, 早起的她半點怨言也沒有.  在機上吃過早餐後很快就睡去, 半小時後起來, 之後一直都能安坐在椅裡玩填色遊戲.
- 知道要在酒店過夜, 起初也有要求要回家裡睡, 經過牛太一輪解釋後, 她亦能明白及接受, 整夜都能夠安睡, 並沒有出現去年在新加坡半夜哭鬧的情況
- 第二天坐快艇到小島沙灘玩, 快艇的速度嚇怕了婆婆, 但小姐竟然不怕.  回程時牛生要求船長駛慢一點, 小姐說: 點解咁慢架, 開快d 啦, 我鐘意快d 呀.
-第三天我們要乘2.5小時車程去看螢火蟲, 回程亦要同樣時間.  我們起初也擔心小姐的耐力.  出乎意料, 去程時她就不停說話, 唱歌, 總知就吱吱喳喳嘈過不停.  回程時, 很快就睡在牛生的懷中, 縱使從車廂抱進酒店時己經弄醒她, 但進到房裡亦能繼續睡.  這是以前不會發生的.
-愛回家的小姐, 在回程的飛機上一直不肯睡, 直至上的士時己經是零晨12時多, 她知道終於可以回家, 就安心去找周公子. 

cc 上一次搭飛機剛好是一年前, 真的, 不要少看小朋友的記憶力.  當時只有2歲半的她, 至今還記得:
- 上次搭果架飛機壞左, 要轉機;
- 我乖呢, 瞓醒覺姐姐就會送禮物比我;
- 點解, 上次落左機要響出面等架bb 車, 今次無bb 車...

還有, 她的觀察力亦有明顯進步:
- 下機後, 她看到別人拖著行李箱下機, 她問牛太: 點解人地d 篋可以帶上機, 我地果d 唔得架?
- 拿著自己和媽媽的身份証, 她問: 點解媽咪呢張有相, 我果張無既

小姐愛玩亦愛回家, 幾天裡她都很享受玩樂的過程, 尤其是到島上沙灘餵魚魚.  她知道看完螢火蟲後第二天就會搭機回家, 牛太那晚問她: 不如聽日唔好返香港住, 去島到玩多一日餵魚先返去啦.  cc: 唔好啦, 玩左就得架啦, 我好掛住屋企呀!  這個妹妹, 3歲已經有嚴重home sick, 看來將來不適合要做出trip 的工作.